Upplýsingar fyrir þá sem hafa áhuga á Wegovy lyfjameðferð við þyngdarstjórnun

Ef þú ert að velta fyrir þér lyfjameðferð til þyngdarstjórnunar, gæti Wegovy verið kostur fyrir þig. Þetta lyf, sem hefur fengið mikla athygli fyrir áhrif sín á þyngdartap, er ætlað einstaklingum sem eiga í erfiðleikum með að léttast með hefðbundnum aðferðum eins og mataræði og hreyfingu. Hins vegar eru ákveðin skilyrði sem þarf að uppfylla til að fá lyfinu ávísuðu.

Hverjir uppfylla skilyrðin til að fá Wegovy?

1. Þyngdarstuðull (BMI): Wegovy er yfirleitt ávísað til einstaklinga með BMI yfir 30, sem telst offita, eða þeim með BMI yfir 27 sem eru með tengda fylgikvilla eins og háan blóðþrýsting, greindan kæfisvefn eða með blóðfituröskun. ATH ef þú fellur ekki undir þessi viðmiðunargildi fæst lyfinu ekki ávísað.

2. Ábendingar um króníska ofþyngd eða offitu: Til að fá lyfinu ávísuðu þarf læknir að meta hvort þú glímir við langvarandi ofþyngd eða offitu sem ekki hefur tekist að stjórna með lífsstílsbreytingum. 

3. Ástand sem krefst þyngdarstjórnunar: Ef ofþyngd þín er farin að hafa veruleg áhrif á heilsu þína, til dæmis ef þú ert með alvarlega þyngdartengda fylgikvilla, getur það verið hluti af ákvörðun læknis um að ávísa lyfinu.

Hvað er Wegovy?

Wegovy er lyf sem inniheldur semaglutide, sem er svipað og náttúrulegt hormón (GLP-1) sem stýrir matarlyst. Það dregur úr hungurtilfinningu, eykur mettunartilfinningu, og hjálpar þannig fólki að borða minna og léttast.

Hvernig virkar Wegovy?

Wegovy virkar með því að líkja eftir hormóninu GLP-1, sem líkaminn framleiðir venjulega eftir máltíðir. Þetta hormón:

• Hægir á magatæmingu → maturinn er lengur í maganum og þú upplifir lengur seddutilfinningu. 

• Minnkar löngun eftir mat → þörfin fyrir að borða minnkar og matarlöngun minnkar.

• Styrkir mettunarboð → þú upplifir mettun fyrr og borðar sjálfkrafa minna.

Samspil þessara þátta leiðir til minni kaloríuinntöku og þar með þyngdartaps.

Hvað þarftu að hafa í huga?

Wegovy er langtímameðferð sem dregur úr hungri og eykur mettunarboð, hjálpar mörgum að ná 10–15% þyngdartapi og getur bætt heilsufar en getur valdið meltingaróþægindum og krefst reglulegrar notkunar; lyfið er ekki niðurgreitt (nema í undantekningartilfellum) og kostar oft um 25.000–50.000 kr. á mánuði. Mikilvægt að vita að GLP-1 lyf virka ekki fyrir alla. 

Er Wegovy langtímalausn?

Lyfjameðferð með Wegovy er yfirleitt hugsuð sem langtímameðferð. Rannsóknir sýna að þegar meðferðinni er hætt er hætta á að þyngdin aukist aftur. Því þarf að líta á lyfið sem hluta af heildstæðri nálgun í þyngdarstjórnun sem innifelur einnig breytingar á lífsstíl.

Er hægt að fá lyfið niðurgreitt?

Sjúkratryggingar Íslands taka aðeins þátt í kostnaði við lyfið í takmörkuðum tilfellum, til dæmis ef BMI er 45 eða hærra og fylgikvillar eru til staðar.

Er Wegovy rétt fyrir þig?

Ef þú ert að hugsa um að byrja á Wegovy er best að panta tíma hjá lækni til að meta hvort þú uppfyllir skilyrðin fyrir lyfjameðferðinni. Læknirinn mun skoða heilsufarslegar forsendur þínar og meta hvort Wegovy sé viðeigandi lausn fyrir þig.

Þarf ég eftirfylgd

Eftirfylgdarviðtöl eru hluti af þjónustunni sem veitt er á Klíníkinni. Við metum hvort þörf sé á blóðprufum, bjóðum upp á fullkomna mælingu á þyngdarbreytingum og styðjum við þig í þessari vegferð. Þú ert velkomin í viðtöl/mælingar þrátt fyrir að fá lyfinu ávísað frá öðrum læknum en þeim sem eru á Klíníkinni.